HELP International School ( 原文寫於2021年6月15日｜馬來西亞 ) 係人都知，菜苗最怕普通話。 佢細個連普通話卡通都冇興趣睇，而家嚟到馬來西亞讀書，點都避唔開要學華語（普通話）。 之前已經有朋友同我講過，馬來西亞學校嘅華語程度同香港有少少唔同。例如呢邊五年級嘅程度，大約相等於香港二年級左右。 聽落好似輕鬆咗，但我哋都唔敢抱太大期望。 畢竟，佢連中文本身都唔太鍾意學。 所以我哋一直都只係鼓勵佢：「盡力就好啦。」 😂😂😂 前幾日同佢傾開學校趣事，佢突然同我講： 「我而家開始覺得華語好少少啦！」 我即刻精神一振。 咦？呢個係重大發現喎！ 原來老師上華語堂時，係用英文加華語去教，而唔係全程華語教華語。 聽完之後，我真係好感恩遇到呢間學校。 我同菜苗講： 「咁咪好囉！終於搵到適合你嘅方法啦，咁就盡力去學習啦！」 菜苗爸聽到之後都忍唔住話： 「其實同我當年學日文一樣啫。老師係用廣東話加日文去教，唔係日文加日文教㗎嘛。」 「如果一開始全部都係日文，點會聽得明？」 諗落又真係有道理喎。 🤣🤣🤣 雖然因為疫情關係，學校一路維持網課直到暑假，但菜苗每日都上得好投入。 每逢小息，佢就會衝落樓搵零食。 夠鐘之後，又會自己走返上樓上堂。 功課唔使催，自己會做。 原來學校嘅功課除咗評估學習進度之外，仲會為自己所屬嘅 House 爭取分數，令學生更投入校園生活。 呢個設計，我覺得幾有心思。 最近我哋仲將佢嘅書枱搬咗去二樓客廳。 因為佢始終唔慣一個人一間房，夜晚成日又走過嚟同我哋一齊瞓。 😂😂😂 所以最後決定重新安排書枱位置，方便佢自由出入。 結果搬出客廳之後，效果出奇地好。 今日上堂時，佢笑到好大聲。… Continue reading