以前喺香港，飲茶真係一件好平常嘅事。 星期六日，一家人去酒樓飲茶，蝦餃、燒賣、叉燒包、糯米雞，食來食去都係嗰幾款點心，但偏偏就食極都唔厭。 離開香港之後，先發現原來點心都可以變成「奢侈品」。 馬來西亞飲茶都仲算平，但英國同美國就真係唔同講法。一籠燒賣隨時要接近五英鎊，換返做港幣都夠喺香港食兩三籠。 於是，自從移居海外之後，我開始奉行一個原則： 想食咩，就自己學整。 網上有食譜、有影片，慢慢摸索，竟然發現好多以前以為好難整嘅食物，其實都可以喺屋企完成。 點心，自然亦不例外。 雖然未必做到酒樓師傅嗰種百分之一百嘅味道，但如果有八、九成相似，其實已經足夠令人心滿意足。 今次挑戰嘅，係我家Jason最鍾意嘅點心之一——糯米雞。 糯米雞嘅靈魂，當然係糯米。 除此之外，仲要有雞肉（我用雞髀肉）、冬菇同臘腸。至於自己食嘛，加隻鮑魚落去都唔算太過份啫！ 最近我仲將配方升級，多加咗肉碎做餡料。 結果每一隻都份量十足，打開荷葉嗰刻香氣四溢，糯米吸晒肉汁同冬菇香味，再加埋鮑魚，真係非常滿足。 老實講，而家自己整嘅版本，餡料仲多過好多酒樓賣嘅糯米雞。 食完一隻，基本上已經飽晒。 有時諗返轉頭，移民生活雖然令我離開咗熟悉嘅地方，但亦因為咁，學識咗好多以前唔會做嘅事情。 例如包糯米雞。 原來有啲味道，即使離開咗香港，都可以自己親手包返出嚟。🍳 New Home Cook in Britain | Abalone Sticky Rice Chicken Back in Hong Kong, Dim sum was simply part of everyday… Continue reading