終於放暑假啦！今年我哋選擇返香港探親，亦想趁機帶 Jason 再去一次佢細個時經常去嘅地方行吓。原來佢已經有 4 年冇返過香港，相信今次會有好多不一樣嘅感受同回憶。 今次旅程亦係我哋同 Jason 爸爸最後一次短途旅行。九月之後，佢就會返香港生活，所以今次特別珍惜大家一齊相處嘅時間。 而今次仲有一位特別興奮嘅新旅伴——Choco 🐶💕呢個係佢第一次出門旅行，全程開心到非常亢奮，真係笑死人！😆 Jason 一放學，我哋就把握時間，先去市中心食 琦興茶餐廳。因為之前見網上好多人都話好食，所以今次特登去試吓。 我仲介紹佢哋食乾炒牛河！真係好難得可以喺英國食到有「鑊氣」嘅乾炒牛河，大家食完都讚不絕口。😋 至於 Choco，見到我哋食得咁開心，仲以為自己都有份，所以興奮到不得了！我同 Jason 只好夾住佢坐，驚佢突然衝去搶食 😂 最後，當佢終於明白自己冇得食人類食物後，就失望地伏喺我身邊。見到佢個樣咁可憐，我唯有畀少少狗零食氹返佢開心啦～🐾 食完飯，我揸咗大約 3 個鐘車，終於到達巨石陣附近嘅酒店。酒店位置非常方便，而且只需要加 £25，就可以帶埋小狗一齊入住，對我哋嚟講真係好方便！ 放低行李後，我哋就即刻帶埋 Choco 去巨石陣。 出發前，大家都做足功課：我問咗 ChatGPT，Jason Daddy 就問咗同事，大家都話其實唔一定要買票入場，只要喺外圍影相，已經足夠欣賞巨石陣嘅壯觀景色；除非真係好想近距離睇清楚石頭上嘅紋理啦 😆 我哋去到巨石陣時已經大約晚上 6:30，好彩係夏天，天色仲好光。 我哋沿住條路慢慢揸去外圍，見到附近已經泊咗好多露營車。相信有部分人真係嚟露營，但亦有部分人可能係以露營車為家，長期喺呢度生活。因為有啲車睇落已經泊咗好耐，好明顯係有人長住喺度。 Choco 一落車就即刻勁興奮！🐶💨佢好似一隻牛咁，拉住我哋不停向前跑，完全感受到佢對第一次旅行嘅熱情！🤣 我哋沿住旁邊嘅小路慢慢行入巨石陣。途中見到地上有幾個小圓圈，好奇之下我又問咗 AI。 原來喺好耐以前，呢啲位置曾經有樹生長。當樹倒下之後，地上留下咗樹坑，而考古學家可以透過坑內嘅泥土同其他資料，推測當時嘅環境。所以之後就喺原來嘅位置留下記號。… Continue reading