每逢農曆新年前夕，Mary 姐總會到街市買十幾二十斤蘿蔔回來整蘿蔔糕。 由刨蘿蔔開始，到切冬菇、臘味粒，浸蝦米、瑤柱，再到炒料、蒸糕，往往由清晨忙到深夜。每年當新鮮出爐的蘿蔔糕飄出香氣時，我都由朝早流口水流到凌晨，因為我真係好鍾意食蘿蔔糕。 有一年我決定幫 Mary 姐一齊整，先知道原來整蘿蔔糕真係一門體力活。十幾二十斤蘿蔔要逐條刨絲，絕對唔講得笑，刨到最後雙手都麻痺；切冬菇、臘味同其他材料，又切到手指起晒水泡。自此之後，我更加明白每一底蘿蔔糕背後嘅心機，所以每年我都努力幫 Mary 姐食晒啲蘿蔔糕，算係用行動支持佢啦！ Mary 姐每年都會整十幾二十底蘿蔔糕送俾親朋戚友。大家收到都好開心，甚至每年都期待自己會唔會成為幸運兒，分到一底熱騰騰嘅蘿蔔糕。 自從離開香港之後，我每年都會懷念 Mary 姐整嘅蘿蔔糕。用料十足，冇味精，蘿蔔味濃郁，真係出面食唔到嘅味道。 於是，我開始自己學整蘿蔔糕。 未離開香港之前，我仲同前夫奶奶同住。有一年因為實在太想食蘿蔔糕，就上網搵咗好多食譜研究。最後跟住一位「大師姐」嘅做法去整，味道非常接近我心目中嘅理想版本。 不過整完之後，我發現有一個地方唔太啱自己口味。傳統做法會留起一部分冬菇、臘味等材料鋪喺蘿蔔糕面，但切件嘅時候，啲餸料往往會鬆散跌出嚟。於是第二年再整嘅時候，我改良咗少少做法，將材料更加平均地混入糕身裡面，結果切出嚟既好睇，又方便食用，更加合我心水。 我特別鍾意加冬菇。冬菇本身帶有獨特香氣，令蘿蔔糕味道更加豐富。不過因為始終係菇類，做完之後唔適宜喺雪櫃放太耐，所以每次整好，我都會盡快同家人朋友分享。 就咁，蘿蔔糕慢慢由 Mary 姐嘅招牌菜，變成我嘅招牌菜之一。 而我亦承襲咗 Mary 姐嘅傳統。每逢新年，都會整多幾底送俾身處海外嘅香港朋友、鄰居同親友。因為我一直相信，食得是福，而美食最幸福嘅地方，從來唔係自己食得幾好，而係有人願意同你分享。🍳 Jackie’s Kitchen in England | Turnip Cake Every year before Lunar New Year, Mary would head to… Continue reading